Ingravidez

…en estado de ingravidez.

Ingravidez, ditosa verba.

Ao tempo que ulo o neumático,

cal solimán enrabechado contra o cerume gris,

tezo en efluvios unha cinta de dedaleiras.

Excitación cardíaca e amago de sorriso.

Verea, verea torta…

Creo que xa non volverei a ficar perdida polos camiños.

Xa vexo a saída, a luz branca convídame a correr impetuosa.

A forza dos nosos corazóns é inexplicable.

***

Metafísica das faíscas ardentes.

bailadela ditosa en noite de lúa chea,

Cos pés nus e inocentes.

O río lambe vagaroso os fiúnchos da beira.

Agora só lembro sumirme nesa esfera, e lanzar ao ar o meu pano, o meu pano branco…

Despois do transo,

Os corazóns latexan compasados.

A porta aberta déixame ulir as rosas recén cortadas.

Sorrío, debrúzome no peitoril da fiestra e

… lanzo.ao.ar unha rosa vermella, a que ficaba atada cunha fita no escritorio. Por favor, lévame canda ti, paseniño, camiñando sobre o devalar do verso…

                       

L.